เอาความคิดฮอดคิดเถิงพ่อแม่พี่น้อง เฮือนซานบ้านส่อง มาฝากมาต้อนเด้อครับ ผญาประกอบดนตรีอีสานบ้านเฮา ผญา โดย อ.สายันต์ มาตรา (คนคอย)

คืนนามาสร้างแปง โรคโควิดพิษฮ้าย...............กระจายแผ่ไปหลาย คนสิตายย้อนหิวโซ............พ่องโตซุคนพร้อม

เงินออมมาเบิดกลี้ยง..........เหลือแต่เพียงถงเปล่า คิดขึ้นมาอุกอั่งเอ้า..............ข้าวสารนึ่งกะบ่มี หากแม่นเป็นอยู่แบบนี้........ชีวีหมุ่นพังทลาย 

ย้านแต่ตายบ่มีเหลือ...........เทื่อสิหวิดโควิดม้าง 

เบิ่งแนวทางรัฐหาแก้...........ปานปัวแผลที่มันเน่า 

พอบรรเทาบ่ซ่วงไข้............ทายาไว้ป่วยปี

  งานการมีทำบ่ได้................โรงงานใดกะปิดอยู่ 

มีแต่ขดขี่คู้.........................อยู่ในห้องก่องน้ำตา 

คิดขึ้นมาใจสะท้อน.............คราวก่อนเถิงความหล้ง 

เด้นอ เทื่อที่ยังอยุ่อีสาน...............ถิ่นฐานคองเค้า ยังมีข้าวอยู่ในเล้า...............นำไหปลาแดกต่อน 

ยอดอ่อนผักอยู่ห้วย............เลี้ยงควายได้ไปเฮ็ดกิน 

พิษโควิดแทบด่าวดิ้น..........อยากผินอ่วยคืนหวน 

ซวนกันกลับเฮือนซาน.........ถิ่นอีสานที่เคยยั้ง กลับคืนฮังหาก่นไหง้...........เก็บเห็ดไคไปตามป่า 

ทางท่งนาขุดปูน้อย.............ขัวหอยพร้อมมาอ่อมแกง 

ไข่มดแดงเทิงง่าไม้.............เก็บเอาใบผักหวานอ่อน 

แกงลงแล้วซดฮ้อนฮ้อน......หานอนเล่นอยู่ท่งนา เถิงแม่นอิดเมื่อยล้า.............กะหากว่ามีความสุข 

อยู่เมืองหลวงสังมาทุกข์......หน่ายแหนงซุแลงเช้า 

กลับคืนเมือวิถีเค้า...............ฮีตคองเฮาครั้งพ่อแม่ 

อยู่เมืองกรุงย้านแม่นแย่......หาทางแก้ฮอดบ่ไหว คืนไปหาหน่อไม้................เก็บผักไซ่มากินนำ 

ซ้อนเอาแมงละงำ...............พ่องแมงดามาเกื้อ 

คืนเมือไปหาซุมเซื้อ...........เครือวงศ์บ่อนโค้งต่าว 

เถิงคราวหยุดอยู่ยั้ง.............เพียงหน้าฮ่วมเฮือน กันแหล้ว